विक्रम बनकर, अहिल्यानगर : पंढरीच्या पांडूरंगाच्या दर्शनासाठी दिंडीने निघालेल्या वारकऱ्यांच्या सेवेसाठी खासदार नीलेश लंके यांच्या संकल्पनेतून नीलेश लंके प्रतिष्ठान व आपला मावळा सेवाभावी संघटनेच्या वतीने २ जुलै ते ४ जुलै दरम्यान टेंभुर्णी ते पंढरपुर मार्गावर परिते (ता. माढा) येथे दोन लाख गरमागरम वडापावसह कुरकुरीत भजी, चहा, बिस्किट व बाटलीबंद पाण्याचे वितरण करण्यात येत आहे.
गेल्या काही वर्षांपासून खासदार नीलेश लंके यांच्या संकल्पनेतून वारकऱ्यांच्या सेवेसाठी नीलेश लंके प्रतिष्ठानच्या वतीने विविध उपक्रम राबविण्यात येतात. लंके प्रतिष्ठानच्या आरोग्य विभागाकडून वारकऱ्यांना मोफत आरोग्य सुविधा पुरविण्यात येतात. लंके यांच्या सूचनेनुसार पारनेर बाजार समितीच्या वतीने वारकऱ्यांना पावसापासून संरक्षण करण्यासाठी रेनकोटचे वाटप करण्यात आले.
व्हिडिओ : जगद्गुरू संत तुकाराम महाराज पालखी सोहळा
२ लाख पाणी बॉटल
परिते येथे या वितरणासाठी खास पत्र्याचे छत असलेल्या मंडपाची उभारणी करण्यात आली असून तिथे ८ भट्ट्यांद्वारे चहा, गरम बटाटा वडे, कांदा भजी तयार करण्यात येणार आहेत. त्यासाठी २५ आचारी तैनात ठेवण्यात येणार आहेत. तर नीलेश लंके यांचे ५०० स्वयंसेवक अल्पोपहार वितरीत करण्यासाठी हजर असतील. २ लाख पाणी बॉटल तसेच २ लाख पावांचेही तीन दिवसांसाठी नियोजन करण्यात आले आहे. दरम्यान, स्वयंसेवकांसाठी भोजनाचीही व्यवस्था या ठिकाणी करण्यात आली आहे.
निलेश लंके राहणार उपस्थित
अल्पोपहार वितरणासाठी परिते येथे मंडप उभारणीच्या कामाची तयारी सुरू असून या अल्पोपहारासाठी विविध दानशुरांनी देणगी तसेच वस्तूच्या स्वरूपात योगदान दिले आहे. खा. नीलेश लंके यांनी या तयारीचा आढावा घेउन नियोजनात काही त्रुटी आहे का? याची माहीती घेतली. दरम्यान २ ते ४ जुलै दरम्यान लंके हे परिते येथे उपस्थित राहून वारकऱ्यांची सेवा करणार आहेत.
पहा व्हिडिओ : अहिल्यानगरच्या वीर हनुमान वारकरी दिंडीचे प्रस्थान
दिंडी चालकांचा सन्मान
पंढरीच्या दिशेने निघालेल्या वारकऱ्यांच्या अल्पोपहाराची व्यवस्था करण्यात आल्यानंतर त्या त्या दिंडीतील दिंडी चालकाचा नीलेश लंके प्रतिष्ठान व आपला मावळा संघटनेच्या वतीने खासदार नीलेश लंके हे स्मृतीचिन्ह देऊन सन्मान करणार आहेत.
वारकऱ्यांची पसंती !
दिंडीदरम्यान गावोगावी वारकऱ्यांच्या सेवेसाठी भाविकांकडून विविध प्रकारचे जेवण तसेच अल्पोपहाराचे आयोजन करण्यात येत असते. नीलेश लंके प्रतिष्ठानकडून मात्र गरमागरम वडा पाव, भजी, चहा बिस्किटचे नियोजन करण्यात येत असल्याने वारकरी या अल्पोपहारास पसंती देत आवर्जुन वडापाव तसेच भजी, चहा बिस्किटचा आस्वाद घेतात.
खासदार लंके यांचे आकर्षण
आपल्या खास शैलीमुळे राज्यातच नव्हे तर देशभर नावारूपास आलेल्या खासदार नीलेश लंके यांचेही वारकऱ्यांना आकर्षण असते. परिते येथे आल्यानंतर अल्पोपहारा अगोदर वारकरी खासदार नीलेश लंके यांना गराडा घालून त्यांच्याशी संवाद साधतात. त्यांच्यासमवेत फोटो काढण्याचाही मोह त्यांना आवरत नाही. लंकेही वारकऱ्यांसाठी वेळ देत त्यांच्याशी मनमोकळया गप्पा मारतात, त्यांच्यासमवेत सेल्फी घेत पुढील प्रवासासाठी शुभेच्छा देतात.
स्थानिकांचाही सहभाग
खासदार नीलेश लंके यांचे महाराष्ट्रभर चाहते आहेत. सोलापूर तसेच पुणे जिल्ह्यातील खा. लंके प्रेमीही या उपक्रमात सहभाग नोंदवत स्वयंसेवकांची भूमिका पार पाडतात. या उपक्रमासाठी आपले आर्थिक तसेच वस्तूरूपात योगदानही देतात.
टिप्पणी पोस्ट करा