ब्युरो टीम : कोपरगाव नगरपालिका सार्वत्रिक निवडणूक २०२५ मध्ये एका राजकीय पक्षाच्या नगराध्यक्षपद व नगरसेवक पदांसाठी दाखल उमेदवारी अर्ज अवैध ठरविण्याबाबत जिल्हा न्यायालयात दाखल अपीलावर सुनावणी झाली. कोपरगाव न्यायालयाचे जिल्हा न्यायाधीश-१ व अतिरिक्त सत्र न्यायाधीश डॉ. डी. डी. आलमाले यांनी निवडणूक निर्णय अधिकाऱ्यांची भूमिका ग्राह्य धरत अपील फेटाळले.
यामुळे संबंधित पक्षाच्या नगराध्यक्षपदाचे आणि २८ नगरसेवक पदांचे उमेदवार निवडणुकीत लढण्याचा मार्ग मोकळा झाला आहे.
या प्रकरणातून निवडणूक निर्णय अधिकारी यांच्या सचोटी, प्रामाणिकता, प्रशासकीय कौशल्य आणि निर्णय प्रक्रियेतील पारदर्शकतेची कसोटी लागली होती. न्यायालयाने दोन्ही बाजूंचा युक्तिवाद ऐकून घेत कोणतीही प्रक्रिया-त्रुटी नसल्याचे आणि पूर्वग्रहदूषित भूमिका नव्हती हे स्पष्ट केले.
कोपरगाव नगरपालिका सार्वत्रिक निवडणूक २०२५ साठी निवडणूक निर्णय अधिकारी तथा उपजिल्हाधिकारी भारती सागरे (गायसमुद्रे), सहाय्यक निवडणूक निर्णय अधिकारी तथा तहसीलदार महेश सावंत, सहाय्यक निवडणूक निर्णय अधिकारी सुहास जगताप यांचेसह निवडणूक शाखेची टीम काटेकोरपणे काम पाहत आहे.
अर्ज स्वीकृतीच्या शेवटच्या दिवशी (दि.१७ नोव्हेंबर) शेवटच्या दोन तासांत तब्बल १२५ उमेदवारी अर्ज दाखल झाले, ज्यांची प्राथमिक तपासणी दुसऱ्या दिवशी पहाटे ४ वाजेपर्यंत सुरू होती.
छाननी व हरकती प्रक्रिया पूर्ण झाल्यावर २३७ अर्जांपैकी ५६ अर्ज हरकत आणि पात्रता तपासणीमुळे अवैध ठरले. नंतर एका राजकीय पक्षाने प्रतिज्ञापत्रावरील स्वाक्षरीबाबत आक्षेप घेत कोर्टात अपील दाखल केले.
२२ व २३ नोव्हेंबर रोजी दोन्ही बाजूंनी न्यायालयात जोरदार युक्तिवाद झाला. सुनावणीदरम्यान निवडणूक निर्णय अधिकारी भारती सागरे यांनी छाननीच्या वेळी अपीलकर्त्यांनी कोणतीही लेखी अथवा तोंडी हरकत नोंदवली नव्हती, असे स्पष्ट सांगितले. “भारतीय लोकशाहीची मूल्ये जपत किरकोळ कारणावर उमेदवारांना अपात्र ठरवणे योग्य ठरणार नाही,” असेही त्यांनी नमूद केले.
न्यायालयाने निवडणूक प्रक्रियेतील पारदर्शकतेवर भर देत अपील फेटाळले.
निवडणूक निष्पक्षपणे पार पाडण्याचे आवाहन
निवडणूक निर्णय अधिकारी भारती सागरे (गायसमुद्रे) म्हणाल्या, “निवडणूक शाखेतील सर्व अधिकारी-कर्मचारी निष्पक्षपणे कार्यरत आहेत. मतदारांनी निर्भयपणे मतदानाचा हक्क बजावावा.
या निर्णयामुळे लोकशाही मूल्यांचा विजय व प्रशासकीय पारदर्शकतेचे उदाहरण समोर आले आहे.
टिप्पणी पोस्ट करा